БӀаьстан хиш доладаларга кийчо еш ба республике
БӀаьстан хиш доладелча хила езача кийчонга хьожаш хилар лаьрхӀа цу гӀулакха оттаяь комисси, шоашца МЧС болхлой болаш. Вай мехкарча хиш долхача доазонашка, тӀаьшка хьожаш чакхбаьлар уж. Из хоам «Сердало» газетага бир МЧС болхлоша. Эса, Яндар, Наьсар, ГӀалми, Кен, Шолж, Ачалкх яхача вай мехка долхача хишка хьежар уж.
«Тохкама балхо хьахьекхар, Кен, Шолж яхача хин моттигашка, царех дӀакхеташ йолча Пхьилекъонгий-Юртарча, Эккажкъонгий-Юртарча, Буро кӀалхарча, Сурхо тӀарча моттигашка дукха лийга гаьнаш, нувхаш ядилга. Кен яхача хин оагӀонаш а дикка цӀенде дезарех я, Ӏокхийсача хӀамаех.
Эса доазон тӀа кирпишкаш, бетона доакъой, иштта кхыйола нувхаш Ӏайнай. Цу ерригача моттигашкара ца эша хӀамаш дӀайоахаш болх ма хулла сихагӀа дӀахьо аьнна тӀадиллар цу гӀулакха бехктокхаме барашта», - белгалдир МЧС болхлоша.
