Юртбоахама предприятешка паччахьалкхен доалахьардар мишта леладе хьежар
Наьсарен кхалерча прокуратуро ГӀалгӀайче гучадаьккхар, юртбоахама предприятешка паччахьалкхен доалахьардар леладарца дувзаденна закон телхадеш хилар, яхаш, дийцар «Сердало» газетага тӀахьожам лоаттабераша.
«Паччахьалкхен доалахьардар леладара закон телхадой хьежар «Дружба» яхача ГУПе. Гучадаьлар, 2016 шера денз, цу боахама тӀалатташ йола 23 гӀишлои 2804 гектар лаьттеи цун доалахьа цахилар. Иштта боахаме йоацаш я МТЗ-1523 трактор, цун мах ба 1,7 млн сом», - йоах хоамо.
Цул совгӀа, боахаме дац, из паччахьалкхен рузкъа кхыча нахага кхаьча хилара тешал деш дола каьхаташ. Из лелаярах дола ахча предприяте чота тӀа хьатӀадоагӀаш а хиннадац. Бакъда цунах предприяте доалахьардар, лаьтта леладеш санна, йоал дӀалуш хиннай, цунна а лаьттанна а йоагӀаш йола отчёташ еш хиннай. Прокуратуро тохкама органашка материалаш дӀаяхьийтай, зулам деш вола саг бехктокхаме озар дехаш.
