Моттигерча ишкола дешархоша, Iаьлий-Юртарча хоржамий даькъ тIа кхадж тасса хьабоагIача наьха, дог гIоздаьккхар иллешца, ашарашца, яхаш, дийцар «Сердало» газетага цу моттиге.

«№1 йолча ишкола даькъ тIа дIахьош долча хоржамашка дакъа лаца ера ГIалгIайчен цIихеза лор, унахцIенон министр Антошканаькъан Зарема, ший гIончаца; иштта Наьсарен кхален даькъ тIарча хоржамий комиссе кулгалхо Ховтанаькъан Аьсет, Юрта кулгалхо Овшанаькъан Хьамзат, кхы дукхабараш», - хоам бир тхога.

Хоржама комиссе кулгалхочо Татренаькъан Iайшета белгалдаьчох, таьрахьашка хьежача, гуш да моттигерча бахархоша хIанз дIахьош долча хоржамий лоархIам дика кхетабеш хилар. Дукхача боккхийча наьха дехарах, цIагIа дIа а ухаш, царна новкъостал даьд кхадж тасса.