ГӏалгӀайче пхе сага жоп лургда терроризм къайлакхахьарах
ГӏалгӀайче техка даьлар моттигерча пхе сага духьалара уголовни гӀулакх, уж бехке бу террористически оагӀонца дувзаденна зулам къайлакхахьарах, цох хоам ца беш битарах. ГӏалгӀай Республике гӀолла йолча Россе СУ СК кхалешта юкъерча тохкама даькъо гучадаьккхар, бехке веш волча пхе сагах шиъ кхийна ваьнна цахилар, яхаш, дийцар «Сердало» газетага ГӏалгӀай Республике гӀолла йолча Россе СУ СК зарбан болх лелабераша.
«Тохкамхоша белгалдир, 2024 шера маьцхали бетта, республикан шин сагаца цар вӀашагӀкхетар хиннилга, цигара царна хайра халкъашта юкъерча террористически организаце кулгалхочунна цар дув биа хилар, шоаш цунна мутӀахьа хургба, аьнна. Шоашта террористически даькъ тӀа зуламаш леладеш болчарна деш дола таӀазар довзаш дале а, цу пхеннех цхьанне а бокъонаш лораяраерашта из хайтадац», - йоах хоамо.
ГӏалгӀай Республике гӀолла йола Россе УФСБ материалаш ларде а лаьца, уголовни гӀулакх хьадийллад цу наха, из суде дӀачуденнад дӀахо тахкара.
