ГӀалгӀайче дувцаргда, виззача Георгиевски кавалерах Малсаганаькъан Элбурза Мурадах
Мехкахдахара дагалоаттама гӀишлой мемориала гойтама зале кхоана хьаелларгья экспозици, цо гойтаргба Россе Императора эскара прапорщика, виззача Георгиевски кавалера Малсаганаькъан Элбурза Мурада вахара наькъах.
Из гойтам кийчбаьб «Лоаман аьрзеш» яхача проекта чубоагӀаш, дукха ха я цо ГӀалгӀайчен бахархой теркам тӀаоза.
«Хьажа боагӀаргбарий теркамга хургда тамашийна сурташ, каьхаташ, цу исторически сагах бола хоам шера гойтаргба цига, иштта таро хургья вай мехкахочун карагӀдаьннараш довза», - аьлар «Сердало» газетага мемориала болхлочо.
Гойтаме дувца лерхӀ прапорщика Малсаганькъан М.Э. тайп-тайпарча ханашка хиннача исторически хьалах а вахара наькъах а лаьца. Хьаьшашта довзаргда хьалха хеза доаца дукха кердадараш, цун карагӀдийннараш, цо гойта турпала гӀулакхаш.
