ГӀалгӀай мехка бер дӀадаларах еннача кхалсага гӀулакх тохкаш да
ГӀалгӀай прокуратуро хьадийллар 35-шу даьнна кхалсаг яларах дола гӀулакх. Республикан шин дарбанче дарба даьчул тӀехьагӀа, ялар хилар цун. Росздравнадзораца цхьана дӀабихьача тӀахьожама балхо хьагойтар, лорий новкъостал деча кхоачамбоацараш хилар, аьлар «Сердало» газетага прокуратуран зарбан болх лелабераша.
«Цхьан бетта нийсденна хьал да из. 2024 шера оагӀой бетта, республикан клинически бераш деча центре нийсъелар из кхалсаг, кхы а хьаданза дола бер денна хиларах, цун кара доацаш, из бер дӀадаьнна хиннад. Цун хьал халагӀа дерзаш латташ хиларах из дӀайигар ГӀалгӀай Республикански, Ахушканаькъан А.О. цӀерагӀча клинически дарбанче; цига из, хала хете а, елар 2025-ча шера, наджгоанцхой бетта 13-ча дийнахьа»,-йоах хоамо.
Иштта хоам бу, лорий балха тӀа кхоачамбоацараш гучадаларах. Прокуратура дӀабихьача балха унахцӀенон федеральни закон телхадаь а, лорий а иштта шинна а урхаллен гӀулакхерча наха а, лорий профессиональни декхараш кхоачашдаь цахилар белгалдаьлар.
Прокурора беча тӀахьожама кӀийлен тӀа уголовни гӀулакх хьадийллар, профессиональни декхар кхоачаш ца дарах из саг енна хилар чӀоагӀдеш. Республикан прокурора ший теркама юкъеийцад из гӀулакх, дӀахо хиннар миштад ха, бехктокхаме бараш цу юкъе оза ловш.
