Ер шу дӀадоладелча денз, ГӀалгӀайчен наькъашка 46 саг веннав
28.10.2023 14:25
Наькъашка бовш болча нахах болча хоамага хьежача, гуш да, ер шу дӀадоладелча денз, транспортаца новкъа хула хьовзамаш ГӀалгӀайче 16,8% кӀезиглуш доагӀилга. Бакъда дӀадахача шера хинначунца нийсдича, нах байна хатараш дукхагӀа да 39%, ДТП юкъе нийсвенна веннараш 46 саг ва. Уж ийрча моттигаш нийслу, водителаш корта бохабу малар менна хиларах, новкъа лелара бокъонаш ца йовзаш е ца лелаеш хиларах, наькъал дехьадоала бераш лорацадарах, иштта кхыдолча бахьанех.
«ХӀара водитель, ше машенаца аравоалаш дагалоаттаде декхарийла ва, кхыча наьха вахар ше лораде дезаш волга. Сагота воацаш, водитель хиларо доккхача вонга кхоачаву. Кхы тӀа чӀоагӀбе беза цу тайпарча водителашта лоаттабу тӀахьожам, новкъа лелара бокъонаш цар телхаергйоацаш. Цу юкъе дукхагӀа дакъа лаца деза юкъара гӀулакх леладераша, дин викалаша, хьалхарча аргӀагӀа кагирхоша», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас, ше из хьал дувцаш.
Наькъашка хьовзамаш хилара бахьанашта юкъе «Кавказ» оала федеральни никъ тоабеш латта дукха ха хилар а да. Уж балхаш 2020 шера денз тӀехьадоахаш латт, цу хана йистедаьнна хила дезаш а дар, цунах яздаьдар «Сердало» газета корреспонденташа хьалха а. ХӀанз из йистебаккхара йола ха 2025 шерга яьккхай машиннаькъаш тоадара йолча федеральни урхаллено.
Укхаза белгалдаккха безам ба, ГӀалгӀайчен автодора министерствос ший болх лаьрххӀача хана чакхбоаккх, «Дика кхерамзлен наькъаш» яха къаман проект кхоачашъеш. Мехка уж балхаш деш, 200 км машиннаькъаш тоадаь даьннад.
