Къамашта юкъерча довно боабаьрий таьзет хилар
30.10.2023 12:38
1992 шера хиннача хатарах байнача наьхах болча дагалоацама Мемориале, таьзета митинг хилар. Из хетаяь яр ардара бетта 31-ча дийнахьа гӀалгӀай къаман тӀаэттача Ӏазапá. Цига гулбелар ГӀалгӀайчен дукха бахархой. Иштта цига дакъа лоацаш хиннача ГӀалгӀайчен Халкъа Гуллама кулгалхочо ТӀумхой Мухьмада, ГӀалгӀайчен Кулгалхо дагавувлаш волча Къоастой Ӏийсас, юкъара болх лелабеча Бузуртанаькъан Хьамзата, Шолжа-Шахьара Исламски института ректора Мухлой Жабраила гулбеннарашта хьалхашка къамаьл дир.
«Вайна цӀаккха а дицлургдоацаш, дера из шу, уж денош. 1992 шера хӀирашта, гӀалгӀашта юкъе хиннача хатаро дукха нах боабир, таханалцца мичаб ца ховраш а ба. ХӀанз а, ишттал ха яьннаяр аьнна доацаш, шоай хиннача фусамашка юха цӀабаха йиш йоацаш нах дукха ба. Вай къаман хьалхашка латта декхараш кхоачашдара, тахан сабаре, барт болаш хила деза вай. ЦхьоагӀо, барт хиларо мара нийсхо йоаккхаргьяц, иштта мара кхоачашде таро хургьяц вайна хьалхашка латта декхараш», - аьлар ГӀалгӀайчен парламента спикера.
Митинге гулбеннараша дуӀаш дир 1992 шера, гурахьа хиннача хатарах боабаьрашта тӀера, иштта цар Палестина бахархошта тӀера а дуӀа дир, Даьлагара дехаш царна гӀо дар дехаш. Митинг йистейоалаш, хала боахкача дезалашта лаьрхӀа новкъостал дир.
