Эскаре амал деча вайцигарча кагийча нахага, хьожаш ба республикан викалаш
Вай республикан Москвера массазара викалаш баха хилар Солнечногорскерча тӀема даькъе, цига амал деш ба вайцигара кагий нах. Цига яьккхача хана, цар вӀашагӀкхетараш хилар бӀухошца а царна тӀабаьхкача хьакимашца а.
«Цу тӀема даькъе эскаре гӀулакх ду ха йоаккхаш ва вайцигара 20 салте. Оаха царца къамаьл дир; малагӀа халонаш нийслу хайра, эскаре гӀулакх деча заман чухьа; тхоашкахьара царна фу эш-мала эш хаьттар. ТӀема даькъа хьакимашца бартчӀоагӀам бир, дӀахо а бувзамаш лоаттаде», - дийцар «Сердало» газетага массазарча викалий къаман политиках йолча отдело.
Республике боккхача теркамца хьожаш ба, шоай тӀема гӀулакх вайцигарча кагийча наха мишта кхоачашду. ГӀалгӀай салташа шоай мехка сий лакха лоаттаду, боккхагӀчар шоашта даьча хьехарга хьежжа Даьймехка хьалхара декхар дизза кхоачашду.
