«Гулдара моттиг» яха кхачанцара ИИ – яхь хургья вай мехка
«Гулдара моттиг» цӏи йола кхачан ИИ-яхь дӏаяхьа лерхӏ вай мехка. Цига гуллургба лакха начӏал дола цхьацца хӏама хьакхоллараш, аналитикаш, дата-сайентисташ (хӏама дагадохараш, кхоллараш), иштта кхачан, проектий менеджераш. «Сердалога» из хоам бера тахан ЦУРа болхлошкара.
Бизнеса юкъе хьакхеллача хьаькъалцара технологически гӏулакхаш лацара хетаяь я яхьаш. Доакъашхой кийча йолча шоай тоабанца хьабахка йиш йолаш ба, иштта цу оагӏонца дӏачӏоагӏлуча хана лаха йиш я шийца товргбараш. Хӏама тоадара, ший моттиге лакхвалара тӏехьа дикка аьттув луш да из. Яхьа (хакатона) юкъе я кхоъ балхацара кейс (дакъа).
Эггара хьалхарчун юкъе да геттара дика, пайдане дешара программаш арахецаргйола ИИ-агент хьакхоллар. Иштта клинике хьатӏабахка беза унахой дӏаязбе, царца къамаьл де ховргдола лакха кхетам бола, «новкъост» арахеца веза доакъашхой. Кхоалагӏа дакъа электронни коммерцеца бувзам болаш хургда – моллагӏча кхоачамах дар боаггӏача боараме ше-ше хьаоттаде ховргдола ИИ-оагӏув вӏашагӏаболла беза цига.
Маркетплейса каталог сихагӏа хьалъюзийташ болх хургба цох. Лоархӏамеча, йоккхача моттигашка ше хьакхеллар доаржаде аьттув хиларал совгӏа, 900 000 эзар сом гаргга ахча луш болх ба из.
