ГIазкхий культуран фестиваль хилар
ГӀалгӀайче, Шолжа-Шахьара культуран цӀагӀа, гIазкхий (казакий) культуран фестиваль дӀайихьар. Халкъа культуран, искусствон хоза цӀай долаш; дакъа лоацаш хилар республике баха гIазкхий викалаш, лоалахарча моттигашкара баьхка хьаьший, из кхетаче хьайийллар ГӀалгӀайчен къамий гӀулакхех волча министра Мизенаькъан Руслана; Махачкален, Шолжа-ГӀалан архиепископа Варлаама; иштта ГӀалгӀайче гӀолла федеральни инспектор волча Смирнов Витале.
«Концертни программашца фестивале ена хилар ГӀалгӀайчен паччахьалкхен Хамхой Ахьмада цӀерагӀча филармоне гIазкхий хор, иштта ГIизлара гIазкхий иллей Тирка йистера ансамбль, Къилбаседа-ХӀирий Моздака кхален гIазкхий иллей ансамбль, Ставропольски мехкара Новопавловск шахьара «Соло» яхача коллама кружока солисташ. Фестиваль дӀайихьар безамеча хьале, хьабаьхкача хьаьший безам тӀабодаш. Кхетаче йистейоалаш, гIазкхий хора исбахьален кулгалхошта баркал оалаш дола совгӀаташ а грамоташ а елар», - аьлар «Сердало» газетага из кхетаче вӀашагӀъеллараша. Белгалдаккха деза, ГӀалгӀайчен гIазкхий культуран фестиваль вӀашагӀъеллар, Федеральни агентства новкъосталца, Россе къамий гӀулакхех, арахьарча бувзамех, къаман политаках, зарбан, хоамий Министерство хилар. Цу тайпара культуран гуллам вайцига хьалхара дӀахьош бар.
