ГӀалгӀай мехка дийбад доахан, оалхазараш, жа, гаьзарий
ГӀалгӀайче белгалдир доахан, оалхазараш, жа, гаьзарий йийба хилар, иштта царгара хьадоаккха маша а дукхагӀа хилар. Цунна тешал ду Къилбаседа Кавказстата «Сердало» газетага хьабайтача хоамо.
«Массадолча боахамашка, 2024 шера бекарга бетта 1-ча денга кхоачаш, дӀадахача шера хинначунца нийсдича, гуш да доахан-0,4% (70712 хьайба), оалхазараш-4,6% (494836 оалхазар) тӀакхийтталга; жа, гаьзарий а дукхагӀа я, уж цхьана дӀалаьрхӀача 30268 я - хьокхам ба 3,0%», - йоах хоамо.
ГӀалгӀай Республике карарча шера арахецаш йола шура 2% дукхагӀа я, фуаш дукхагӀа хулаш доагӀа 0,5%. Иштта дулха доадеш дола хьайбаш, оалхазараш 1,9% дукхагӀа да.
Хоам бу, юртбоахама кхача арахецара хьал массадолча боахамашка лакхденнад 3612,9 млн сом хиллал, вешта аьлча, 101,7% дӀадахача шерца нийсдича.
Лоацца аьлча, ГӀалгӀай Республикан юртбоахама даькъ тӀа дика толамаш даьхад, хьалхашка латта юртбоахама кхача арахецара декхар дизза кхоачашдеш.
