«СурхотӀе-Алхасте» никъ тоабеш бола цӀенхашттара болх дӀаболабир
ГӀалгӀайче дӀаболабир «СурхотӀе-Алхасте» юрташта юкъера 12 км бӀаьха никъ тоабеш бола болх. Из болх дӀахьош ба «Вахара хьалаш» яхача программах, яхаш, дийцар «Сердало» газетага ГӀалгӀай Республикан Кулгалхочун, Паччахьалкхен зарбан болх лелабераша.
Цу наькъо вӀашагӀтох ши юрт - СурхотӀе, Алхасте - из ба шаьрачеи лоамани моттигашка бахача наха юкъера юкъ хотташ бола керттера никъ. Белгалду, укх 20 шера из никъ тоабеш хиннабац, кӀоагаш дӀакъовлар мара. Из бахьан долаш, бахархошта а халонаш нийсъеннай, цунца дувзаденна кхерамзлен хьал а унзара да.
«Никъ тоабаро таро лургья кхалешка бахача наха транспорт лоаттаяра хьал аттача даккха; цунца цхьана дарбанче, ишколе, культуран центре вахар-вар сихагӀа хулийтаргда», - аьлар ГӀалгӀайчен Кулгалхочо Келаматанаькъан Махьмуд-Ӏаьлас.
Къахьега дезарий тоабо вӀашагӀбеллаб болх, из бахьан долаш тешшаме а дика а никъ хургба, цул совгӀа кхерамзлен Ӏалашо а хургья. Беррига никъ дӀачубала лаьрхӀад 2026 шера маьтсела бетта.
