Наьха ахча диача банка болхлочунна суд йир вай мехка
Регионарча цхьан банке болх беш хиннача вай мехкарча 25 шу даьннача кхалсага гӀулакх тохкаш хилар Магаса кхален суд. Цун тӀатетт, бокъо йоацача тайпара компьютера чугӀолла тийшаболх кхостабаь, наьха счёташ тӀара ахча лочкъадар. Из хоам «Сердалога» бир прокуратуран зарбан болх лелабераша.
«2020-ча шера ахкан хьалхарча, шоллагӀча бетташка, банка болхло йолаш ший из аьттув хиларах тарра, 70 эзар сом ахча лочкъадаьд цо наьха счёташ тӀара. Цул совгӀа, компьютер чу оттадаьд цо, наха банке хьабаьхка, из ахча шоаш тӀера Ӏодаьккхача санна, хӀаьта ахча дайнарашта цох хӀама хайнадац. Компьютер чура хоам хийцаб зуламхочо тийшача балхах», - йоах тхога бенача хоамо.
Наьха дайнар дӀатакха оттаяьй из, цӀагӀа зӀамига бер хилар теркаме лоацаш, 2,5 шу ха техай цунна судо, цӀагӀа ягӀаш такха езаш.
