Машинаца, цӀермашинаца, фецарча кемаца лелар тоаду вай мехка
Вай мехкарча машинашца, цӀермашинашца, фецарча кемашца дӀа-юха ахар лакхача боараме хилийта гӀерташ, боккха болх дӀакхухь мехка хьалхалаттараша. Из хоам «Сердалога» бир Мехкадаь зарбан болх лелабераша.
«Халкъашта юкъера аэропорт хилар кхо шу хьалха вайцигарча «Магасах». Цо белгалду цигара болх дикача оагӀорахьа хувцабеннилга, кхерамзлен хьал лакха долга», - аьлар мехкадас Келаматанаькъан Махьмуд-Ӏаьлас, цу оагӀонцарча керттердарех дувцаш. «Транспорт» яхача къаман проектага гӀолла вай аэропорт дикка тоаяйтар дехаш РФ паччахьалкхен кулгалхочун заместителгара Новак Александрагара гӀо дийхар республикан хьалхалаттараша.
ХӀаьта цо, массаза санна новкъостал дир. Цу оагӀонцара болх ма хулла тоабара тӀехьа Нохчий мехкарча РЖД «Наьсаре-Шолжа-ГӀала» яха цӀермашинникъ хьабелларгболаш чӀоагӀо яьй республико.
Моттигашкарча бахархошта чӀоагӀа паргӀато луш хургба из никъ. Наькъашца дувзаденнараш ма могга тоадеш, доккхий хувцамаш юкъекхувлаш латт вай мехка.
