Къовсалургба дикагIа бола таксисташ
11.10.2023 14:20
ГӀалгӀайче, лайчилла бетта 15-ча дийнахьа, «Россе дикагӀа вола водитель-таксист» яха ерригроссе яхь дӀахьоргья. Из дӀахьош я, такси дегӀайоалаяра Юкъарча Совето, транспорта Министерствос, Россе МВД новкъа лелара кхерамзлен керттерча урхаллено тӀахьожам лоаттабеш. Вайцига из хул хIанз шозлагӀа. ДӀадахача шера вай лаьтта дикагIа вола таксист хилар Хугой (Хугоев) Мухьмадах, цул тӀехьагӀа цо ГӀалгӀайче дикача оагIорахьара гойтар, Чуваше дӀахьош хиннача ерригроссе яхье дакъа лоацаш.
«Дакъа лоацачар новкъа лелара бокъонех, моттигера истори довзарах долча хаттарашта жоп лургда; машена тхов тӀа хи пела а оттадаь, шоаш из мишта говза лоалл хьагойтаргда. Котбаьннарашта дала оттадаьд 30 эзар сом, цул совгӀа, цар таро хургья ерригроссе яхьашка дакъа лаца. Ерригроссе яхьашка котбаьннарашта дала оттадаь керттера совгӀат да 150 эзар сом, иштта керда автомобиль», - аьлар «Сердало» газетага из болх вӀашагӀбеллача Казанин Кирилла.
«Россе дикагӀа вола водитель-таксист» яхача моттигерча яхье дакъа лаца безам бар дехар хьачудала дезаш ва лаьрххӀа йолча сайта тӀа: https://russia-driver.taxi/#participate. Яхь дӀахьоргья Наьсар-Кертерча куран тIа ( Бакински урам, 89), моттигерча бувзама министерствос новкъостал а деш.
Дукха ха йисаяц ГӀалгӀайчен дикагӀволча таксиста цӀи яккха. Из яхь хьайоагIа 2018-ча шерагара, цига, мах боацаш, дакъа лоац безам болчо. Из дагадехачо яхачох, дикагӀа вола таксист яхача къовсама маӀан да, нах а мухь а дӀа-юха кхухьача зӀамигача машений болх кхы дикагӀа тоабар, из дуккхача наха бовзийтар.
