«Арште бахача наха болх беш латт Чамалхара артизиански гӀувнаш. 2018-ча шера хин турбаш чуяьхка, бурув теха, хий чулоаттаде бешкаш оттаяь, болх дӀабихьабар цига, бакъда хий доладеннадац. 2020-ча шера кхы а кхозза бурув техадар. Мехкадас тӀадилла, насосаш оттаяьяр, хӀаьта а хий Арште Ӏочуоттача бахача нахага мара дӀакхоачаш дацар. Из гӀулакх тохкаш болх дӀабихьачул тӀехьагӀа, соцам баьб, Чамалхара хий хьачуувзаргдолаш. Мехкадас соцам баь, кӀоарга артизиански гӀув я болх беш латтар. КӀоаргал 250 метрага кхаьчача, хий хьалтӀадаьннад. Болхлоша яхачох, кхы а 100 метр ӀокӀоаргбелча, хий дикка хьалтӀадала мегаш да. 150 совгӀа долча Арштерча ковнашка эшаш да из хий. Шин кӀира къахьега дезаш ба болхлой. Кхалерча администраце ахчах дӀахьош латт тахан из болх.