Гӏалгӏай мехка уголовни гӏулакх хьадийллар, ца доагӏаш лаьтта дIалацарах
Гӏалгӏайчен Наьсарен кхален прокуратуро лаьттан закон мишта леладу ха дагахьа, тӏахьожама болх дӏабихьар. Из дӏахьош гучадаьлар лаьрххӏа дола кхоачамбоацараш юкъедаьнна хилар, уж дувзаденна да лаьтта леладара бокъонца. Белгалду Эккажкъонгий-Юрта Кен яхача хин даькъ тӏара 1000 кв.м йола лаьттан дакъа, бокъонах ца доагӏаш, моттигерча яхархочо ший доалахьа дерзадаь хилар.
«Сердало» газетага Гӏалгӏайчен прокуратуре ма аллара, цу лаьттан кадастрови мах ба 643 эзар сом. Из ший доалахьа дерзадар бахьан да юртарча администраце боахамий книжка тӏара харцахьара каьхат денна хилар.
Уж кхоачамбоацараш гучадаларах, Наьсарен кхален прокуратуро лоткъам дӏабахьийтар бехке болча наха духьалара уголовни гӏулакх хьаделла. Цунга хьежжа хьадийллар Россе УК 3 д. 159 ст. уголовни гӏулакх (боккха питам хьовзабарах).
Тохкама болх дӏахьош ба Наьсарен кхален прокуратуро. Цул совгӏа, тӏахьожамхоша из бокъонах доацаш чудерзадаь лаьтта паччахьалкхен доалахьа юхадапара боагӏаш бола болх дӏахьоргба.
