Машинаш кхестаяр (дрифт) бахьан долаш, духхьашха уголовни гӏулакхаш хьадийллар вай мехка
Наьсарен кхалерча полице болхлошта интернета оагӏонашка дайра 19-20 шераш даьннача Наьсарерча бахархоша, бокъонаш телхаеш, наькъа юкъе машинаш кхестаяр.
«Гоалбаьннараш ӏаьдало сиха хьалехар. Кхален ОМВД кулгалхочо Налганаькъан Ахьмада из тайпара хӏама наха новкъарле еш, эзделца доацаш, яхь йолча сагага товш, доагӏаш хӏама доацилга белгалдеш, къамаьл дир царца. Россе Наьсарен кхален ОМВД тохкама оагӏонца царна духьала гӏулакхаш хьадийллад РФ УК 267.1 ст. (кхыча машинашта новкъарле еш, кхерамеча хьале оттаеш, харцахьа ваьнна кхестар).
Мехкара арабовла йиш йоацаш, бокъо йийхка ба уж карарча хана», - дийцар «Сердалога» моттигерча МВД. Цу тайпара хӏама кхестадарах, вай мехка бехктокхаме озар эггара хьалха нийслуш да. Хӏаразбаьнна, машинаш кхестаерашта ши шу суд е тарлуш да. Мехкарча МВД белгалдечох, иштта бехктокхаме озаргба наькъашка машинаш кхестаеш, кхерам боаржабеш мел лелараш.
