Гӏалгӏай мехка лораша, пехкашта чоалхане операци яь, кхалсаг кӏалхаръяьккхар
Гӏалгӏайчен Къоастой И.Х. цӏерагӏча республикан фтизиопульмонологе кхалсаг кӏалхаръяьккхар, пехкашта чоалхане операци а яь. Из дарбанче кхаьчар, чӏоагӏа хала йолаш. Садаха могаш яцар, хӏаьта кер чу дукха тух, хий ӏайнадар. Гӏалгӏайчен говзанчаша, шоай балхах дика кхеташ хиларах, из операци дика дӏайихьар.
«Дагабаьнна, лораша лаьрхӏар цо ловргбола никъ лаха - видео торакоскопически болх дӏабахьа, аьрда пехк тоаеш. Гойтамаоборудовани хиларах, доккха доацача ӏургашка гӏолла хирургаш дӏаяьккхар пехка тӏара телха моттиг, пехк тоӏаяь лаьтта хьал меттаоттадеш. Из болх дӏабахьарах, унахочун таро хилар паргӏата садаха. Дика вӏашагӏбелла операционни болх дӏахьош хилар торакальни хирургаш Мургӏустанаькъан Ибрахӏим, Имагожанаькъан Йоакъап, лор-анестезиолог Албохчанаькъан Ӏаддал-Къаьдар, иштта операционни лор Мейренаькъан Макка», - аьлар «Сердало» газетага Гӏалгӏайчен унахцӏенон Министерстве.
Карарча хана операци яьча кхалсага магар во дац. Из палате хьалчуйоалаяьй, денна, бийсанна цунна тӏахьожаш ба лакха говзал йола лораш. Дӏахо цунна меттаоттара дола дарба дергда цига..
