ДӀадахача шера, боккхача наха 150 эзар социальни гӀулакх дир
2023 шера, вайцигара 877 боккхий нах, заӀапхой социальни Ӏалашонна юкъебахар; боккхийча наха, заӀапхошта социальни гӀулакхаш лоаттадара йолча Республикан центрага гӀолла, яхаш, дийцар ГӀалгӀайчен кулгалхочунца Келаматанаькъан Махьмуд-Ӏаьлаца ший кхетаче йолаш къахьегама министра МутаӀаланаькъан Хьажбикара: «700 совгӀа саг массаза лоаттаеш йолча социальни Ӏалашон юкъевоагӀаш ва, цӀагӀа дӀа а ухаш, царна эшаш дола вахарца дувзаденна гӀулакх лоаттаду. Уж ба 60 шу совгӀа ха яьнна кхалнах, юрта бахаш бола боккхий нах. Молхаш лоаттаяр, кхачан продукташ царна яхьар, цӀагӀа эшаш дола гӀулакх дар, эшаш хилча уж лорашка бигар санна дола гӀулакхаш ду дуккхачарна».
«ЛоархӀаме да, цу наха деш дола новкъостал ший ханнахьа хилийтар. Царна деш долча гӀулакха ший ха хила еза, социальни болхлочунцара бувзам цахаддаш хила беза, нагахьа санна, цӀаьхха, новкъостал эшаш хуле, уж хьакхайка йиш йолаш хургболаш. Кхетаде деза, уж цхьадолча бахьанех хьажа саг воацаш биса хилар. Царга хьожача балха юкъедоагӀаш дамоллагӀа вахаре нийслуш дола хьал, из диц ца деш хила веза хьожаш вола болхло», - аьлар Келаматанаькъан Махьмуд-Ӏаьлас, ше министра къамаьл доашхаш.
Министра иштта белагалдир, социальни болхлоша боккхий нах терко йоацаш цабитар, шоай ханнахьа царна фу эш хьожаш, нагахьа санна эшаш хуле, сиха дарбанче дӀабугаш хилар. Белгалдаккха деза, из болх тоабара «Боккхий нах» яхача программа чуйоагӀаш 12 доалахьара транспорт ийцалга.
Цу тайпара боккхийча наха новкъостал лоаттадара йола къаман «ДегӀаахар» яха проект лоархӀаме я, из тӀаерзаяь я цу наьха вахара хьалаш тоадара, уж аттача бахара. Цу программах мехка боккхийча наьха вахара хьалаш аттача дахара бола болх дӀахохьош ба.
