Урамашка гӏолла цхьа во машин хехкаш лийннар, ӏаьдала болхлоша дӏалаьцар
Полици болхлоех къайлаийккха вада лаьрхӏа хиннав, цхьа во машин хехкаш лийнна 15 шу даьнна мехкахо. Шолжа кхале, полице машин бӏаргагушше, цхьа во машин хьакхостаяь, къайлаэккха веннав из. Тӏехьабаьннараша сацар дехашшше, ма могга михьарваьнна водар саца лаьрхӏа хиннавац. «Сердалога» из хоам бир ӏаьдала болхлоша.
«Полице машинашта новкъарло еш, вала йиш йоацача оагӏон тӏа вувлаш, светофор а вӏалла теркал ца еш кхийстар из. Шозза урагӏа герз техар полице болхлоша, цунга саца яхаш; бакъда, вӏалла шек воацаш, сацанзар из. Машина чархех герз тоха дийзар цар из соцаве», - йоах тхогарча хоамо.
«Ладах» харцахьа номераш яьхкай, лоаллаш ваьгӏар Сурхо тӏара 15 шу даьнна вахархо ва, хӏаьта машина чу кхы а цун ши новкъост ваьгӏав. Тохкамо хьахьокхачох, наькъашкара бокъонаш телхаеш, гонахьара машинаш, нах кхерамеча хьале увттабеш лийнначун наьна цӏерах административни протокол оттадир, иштта ӏаьдала машина хинна зе меттаоттаде дезаргда цун цӏагӏарча наьха.
