«ДӀабихьача тохкама балхо гучадаьккхар, 2024-ча шера ахкан хьалхарча бетта лоалахарча мехка яхархочо, Нохчий мехка тӀом латтача хана, 15 сагах латтача ший дезала цӀа дехад аьнна нийса доаца каьхаташ ГӀалгӀайчен министерстве чуденнилга.

ХӀаьта дезал Илдарха-ГӀалий тӀа бахаш ба, аьнна, дӀаязбаь хиннаб, вӀалла цига бахаш хиннабоаццашехь, цунга хьежжа, цу программан юкъе дакъа лаца бокъо йолаш хиннабац уж», - йоах тхога бенача хоамо.

30 миллион сомах латташ дола сертификат хьаийца, цох харцача наькъаца бартчӀоагӀо оттаеш, ГӀалгӀай мехкара ши цӀа ийцад цо.

Бакъда, цӀенош шоаш хиннарий доалахьа дисад, ахча счёта тӀара Ӏодаьккха дӀадихьад. Массехк сагах латтача тоабо, хьалххе тийшаболх вӀашагӀбелла, доккхача ахчанца лочкъор дарах бехктокхаме озаргба цу зулама бехкебараш.

Цул совгӀа, шахьаре уж 15 саг вахаш ва, аьнна, харцахьарча тайпара каьхаташ оттадарах а бехктокхаме озаргья ахча диар. Прокуратуран болхлоша тӀахьожам беш, дӀахьош латт из гӀулакх.