«ТIехьара ди а, хьалхара фестивала хьалхара денош санна, хоза дера. Фестивала яхьан программаца, ГӀалгӀайчен бахархой а хьаьший а таро хилар документальни фильмаш го. Уж дар «Магадана дотув» (режиссёр Поршняк Андрей, Росси, Москва). «Даькъалаваьр» (режиссёр Гильерме Рейс, Бразили), «Хий» (режиссёр Мэри Дия Шаджу, Инди), «Поэтични Лишуй» (режиссёр Чэн Вэй, Китай), «Суртанча-Раста» (режиссёр Ковани Одва, ЮАР), «Къилбаседера саг» (режиссёр Шолохов Матвей, Росси, Челябинск), «Ӏаьржа вагон» (режиссёр Каржаев Адилет, Кыргыстан), иштта «Таржам» (режиссёр Арлаускас Альгис, Росси-Испани). Исбахьален фильмай яхье тIехьарча ден программо гойтар «Поэта денорг» (режиссёр Юсупов Булат, Росси, Башкортастан), иштта «Лор» (режиссёр Темников Артем, Росси, Москва) яха кинобалхаш, - аьлар «Сердало» газетага ГӀалгӀай культуран министерствон зарбан болх лелабераша. Кино гойташ бола болх дӀабихьар республикан пхийтта даькъ тӀа, цудухьа безам мел барий таро хилар яхье гойта оттадаьча фильмашка хьажа а киноискусство йовза а. Фестиваль дӀахьош хиннача массехк дийнахьа, ГӀалгӀайче советски а Россе а кино дезарий таро хилар цар кхоллам бовза, хӀаьта цӀихезача режиссёраша дийцар, таханарча кинематографе керттерча декхарех.