Тоадаь доалаш латт, 1992 шера хиннача хатарах байнача наьха кашамаш
26.10.2023 01:52
Тоадаь йистедала доахк 1992 шера хатар хиннача хана байнача наьха «ГIоазота кашамаш». Цига дIабехка боахк, хIирашта-гIалгIашта юкъе хатар хиннача хана, боабаь нах. Ардара бетта 30-ча дийнахьа цига кашамашка маьл кхайкабе а, шоай байнараш дагалаца а нах вIашагIкхетаргба, хIаьта иштта цига хиннаб ГIалгIайчен кулгалхо Келаматанаькъан Махьмуд-Iаьла, «Сафмар» ганза кулгалхо Гуцаранаькъан Микаил, из ганз я цIаккха а дицлургдоацача цу ийрчача деношка боабаьча наьха кашамаш тоадара новкъостал дер.
«ГIоазота кашамаш» санна йола моттиг тоаяр лоархIаме да, къаман дагалоаттам а исторически тIехьале а лораяра.
Хьалхарча аргIагIа уж ба вай дог, вай са, вай дагалоаттам, вай лазар. Вай дагалоаттабу цу хатара юкъе байнараш; де доацаш байнача, таханалцца лохаш болча наьха цIераш. Из эггара лоархIамегIа да - цу тайпара уж дагабоагIаш хилар дIагойтар», - аьлар Гуцаранаькъан Микаила.
1992 шера байнарий гIоазота-кашамашка дикка хувцамаш хиннад. Царна юкъе да еррига карт тоаяь хилар, лаьтта шаьрдар, ламазаш деча цIен ченаш, Iолохвала йиш йола кхоаленаш кердаяхар, коанаIараш хувцар, коа брусчатка оала кхера Iотохар, кастлуш укхаза электронни улг а хургда.
«Оаха тхоашта могар даьд Мемориал дагалоаттама лерттIа моттиг хилийтара. Кхыча республикашкара нах, цхьайолча хана, шоаш тIехбоалаш юха а сайце, хьачубоагIа укхаза. Бакъда, хIанз вайна ма хеттара хоза, лостам болаш ер моттиг тоаяьчул тIехьагIа, цу наьха а таро хургья, укхаза хьачубахкарал совгIа, 1992 шера хатар хиннача хана байнарий тайпан цIераш го а, цу денах лаьца дукхагIа довза», - аьлар ГIалгIайчен кулгалхочо Келаматанаькъан Махьмуд-Iаьлас.
Мехка кулгалхочо «Сафмар» ганзаца айхха бувзам лелабаро ший пайда бахь. Ер Мемориал тоаярца йистедоалаш дац, тахан вайца боацарех бола дагалоаттам лелабар. Гуцаранаькъан Микаила новкъосталца ГIалгIайчен массадола бусалба, кераста кашамаш тоадеш лат.
