ГIалгIайчера гулламе дакъа лоацаш хилар юртбоахама министра декхараш кхоачашдеш вола Беканаькъан Казбек, иштта кхыча отделий кулгалхой. Цига дийцар, таханарча денга кхоачаш, боахамашкара ка бола ялат чуийца даьнна хиларах, иштта юкъара хьаийцача юртбоахама хьалах. «Республикан кхашка деррига а дIадийна хинна ялат дар 2023 шера 72, 392 гектар. Царех гурахьа дувш дола ялат 30 гектар, цох хул 110%. ДIадахача шерашка хинначунга хьежача, бIаьсти дувча ялаташа дIалаьцар 41 699 гектар, из 105% дукхагIа да дIадахача шера хинначул. Технически оалаш йола культураш дIайийнаяр 4010 гектара тIа, коартол, баьцадаараш — 2 100 гектар, доакъара лаьрхIа — 5 275 гектар. Ялат чуэцаш дола балхаш дIахьоча юкъа 2023 шера 30 696 гектар ка бола ялат аьрдад, 104 899 тонн эхьад. Цунах гурахьа дув кIа −66 785 тонн хилар, гектара тIара 37 центнер чуэцаш, мукх — 28 595 тонн, гектара тIара 35 центнер чуэцаш, кен − 9 519 центнер, гектра т1ара 30 центнер хьайоалаш, е д1адахача шерца нийсдича 100%. Доакъара лаьрхIа йитай 7 318 гектар. Карарча хана ахархой 2024 шера хургболча хьувкъамга кийчо еш ба, иштта кийчдеш да гурахьа ялат дIадув лаьтта», — цу тайпара хоам бир вай юртбоахамхоша цу кхетаче. Белгалдаккха деза, юртбоахамхоша яхачох, эшаш мел йола техника, удобренеш, доагор долаш да. Ялат дIаоттаде моттигаш кийча я.