Магӏалбик - Махьмад-Хитӏе яхача наькъа хьалхара аргӏа тоаяь яьннай
Магӏалбик - Махьмад-Хитӏе яха никъ тоабеш боахкараш гаьнабоалаш латт ала йиш я тахан. Россе Президента Путин Владимира чӏоагӏонца йоаржаяьча вахарерча гӏулакхех йолча къаман проектага гӏолла, тоабеш ба из никъ. Магӏалбикерча, иштта гонахьа ядача юрташкарча наха лоархӏаме никъ ба из. Балха, деша, дарбанче болхараш лела никъ ба из.
«Магӏалбика кхален моттигашка со хьожаш волаш, бахархоша дехар даьдар; цу наькъа хьал меттадоаладе, аьнна. Никъ во хиларах цу тӏагӏолла дӏа-хьа аха хало долга белгалдир цар. Цул тӏехьагӏа тӏадиллар аз; из никъ къаман проекта юкъелаца, аьнна. Из тоабе безача хьале кхаьча-м дикка ха яр. Йиъ километрага кхоачача доазон тӏара никъ меттабоалабаь ба карарча хана: ӏобиллаб керда асфальт, наькъашкара бокъонаш йовзийташ дола улгаш оттадаьд, иштта 1,5 км кхоачаш гӏашлой никъ биллаб», - язду ший Телеграм-оагӏон тӏа вай мехкадас Келаматанаькъан Махьмуд-Ӏаьлас.
Республикан кулгалхочо теркалдечох, болх шин даькъа бийкъаб. Шоллагӏча оагӏонцара болх 2027-ча шера бекарга бетта дӏахьоргба болхлоша. 17,7 км кхоачаш никъ ба тоабе безар. Керттера балхаш аьтинга бетта дӏахьош хургда.
