ЛоархӀаме 23 гӀишло хьалъяьй республике
03.11.2023 09:48
Хьалъе езача 55 гӀишлонах, 23 гӀишлон балхаш йистедаьхад республике. Из хоам «Сердало» газетага бир гӀишлошъяра балхах йолча министерстве. «Республикера 16 ишкол, боккха болх дӀахьош, тоаяьй; ГӀайрбика-Юртара, ДаьттагӀара культуран цӀенош хьалдаьд, Инаркъера культуран цӀа тоадаьд.
Иштта, дикка хьашеръеш, тоайир Илдарха-ГӀалий тӀара музей», - йоах тхогарча хоамо. Сурхо тӀа, Ӏалий-Юрта 704, 720 дешархой тӀаэца йиш йола кхо ишкол хьалъяьй. Иштта, каьхаташцара болх йистебаьлча, кийча хургья цхьайолча юрташкара берий бешамаш, Шолжа-Шахьарера кхоъ берий беш. Ер бутт дӀабовш, шоай зӀамига хьаьший тӀаэца кийча хила езаш я уж моттигаш. ХьатӀабоагӀа бутт чакхбалалехь, йистедаха дезаш да юхейисача 24 гӀишлон балхаш. Къаман, паччахьалкхен программашка гӀолла, 8 млрд ахча дӀалоацаш йола 64 гӀишло хьалъеш латт вай республике укх шера. Из тахан, вай республикера экономически хьал тоадеш бола боккха болх ба.
