«Таганрогера баьхкача хьаьшашта дика салоӀам вӀашагӀбеллабар Магас-Шахьара культуран, спорта, туризма Центро. Цу тоабаца цхьана самукъадоаккхаш йола программа, шийца экскурси а йолаш, кийчйир ГӀалгӀайчен Малсаганаькъан Тухана цӀерагӀча мехктохкама музее, иштта вай къам мехках - даккхара дагалоаттама мемориала гӀишлошка», -  йоах хоамо.

Эггара йоккхагӀа йолча этнографен «Барта ГӀала» музее таро хилар ГӀалгӀайчен дӀадахача бӀаьшерен юкъерча ханашка кхача, цар истори довза. Хьабаьхкача хьаьшаша шоай цӀай чакхдаьккхар, «Обанхой» яхача столицан ресторане. Из тоаяьй, къаман Ӏадатий мел йола оагӀув юкъе а хьош.

Культуран, спорта, туризман кулгалхочун гӀончас Янданаькъан Апте яхачох, дукхача къамий Россе тайп-тайпарча шахьарашкара хьаьший вайцига хьоашалгӀа боагӀаш хиларо, дукхагӀа балха уйла а тӀайохийт, хӀаьта туристий «ГӀалай мехка» юха а хьоашалгӀа бахка безам хиларо мехка туристически оагӀув чӀоагӀагӀа дегӀайоалае а безам хулийт.