«Дохк оттар вай мехка цхьа ший тайпара хул даиман. Цхьайолча моттигашка, бокъонца лаьтта морхаш Iоессача санна хул; хIаьта цхьайолча юрташка, шахьарашка къаьга малх хул гуш. Мичча беса дале а, шелал гаьна яц, кастта хьакхоачаргья яхилга да из», — белгалдир Наьсаре вахача Йовлой Мухьмада. Цхьа ший тайпара, фаьлгашка дар санна хоза сурт хуле а, лоравала везаш ха я из. Iолохденна латтача дехко дикка бIаргадайтац наькъашкара хьал; цунга хьежжа, чIоагIа сабаре, лоралуш хила деза вай арадаьлча.