Керттера де дезар дукхагӀча даькъе никъ 1ото1абар, гонахьа 1,9 км карт яр да. Уж, хӀанз укх сахьате, даь даьннад. Цул совгӀа хоам беш йола г1ирмаш а оттаяьй, светофораш а ӀоегӀай, хӀанзарчоа аьнна наькъа оасаш а дахийтад. ХӀанад уж хӀанзарчоа? Никъ буллача хана, из чӀоагӀагӀа хургболаш, йӀовхал латташ хила еза, хӀаьта из хилара хӀанз хаоттам а бац, цудухьа, ара кӀеззига й1охъелча, уж балхаш юха кердадоахаргда.

Эггара чӀоагӀагӀа наха дагабоалла никъ бар из, дукха каьхаташ яздора тхога, из тоабар дехаш. Каст-каста кӀоагаш дӀакъувлаш бола болх бора оаха, бакъда из дукха латтацар, хӀана аьлча наькъ тӀа даим машенаш лелар.

ХӀанз де дезаш дисар да, наькъа оасаш дахкар, тӀаккха из болх ше ма барра баь баргба, наькъа кхерамзленна Ӏалашо а йолаш», — аьлар ГӀалгӀай Республикан машений наькъа Министра Хаматхананаькъан Батыра. Из цахаддаш хьожаш ва дӀахьош болча балха дикалга.

Белгалдаккха деза, карарча шера ГӀалгӀайчен наькъахоша, «Кхерамзлен Ӏалашо йола наькъаш» яхача программах, 28 км машений никъ тоабе лаьрх1а хилар.