«Шоай болх лоархIаш, боаггIача боараме из дIахьош бола нах вай къаман юкъе эггара лакхагIа долча лагIа тIа латт», — аьлар Мехкадас. Доккхача совгIаташца дог хьаьстар иштта болаш хьабоагIача къахьегамхой. Царна юкъе бар лораш, политикаш, культуран болхлой, тренераш, спортсменаш, хьехархой, МВД болхлой, волонтераш, бизнесменаш. Белгалбаьча наха юкъе вар вай мехка санна, арахьа а дикка вовзаш вола, дукха шераш прокуратуре болх беш дIаденна Къоастой Махьмада Iийса.

Парламента кулгалхочочунна ТIумхой Мухьмада Федераце Советера яйта грамота елар, шийна тIадаьхка декхараш дизза чакхдоахаш хьаварах.

«КарагIдаьннарех» яха орден елар депутата, Парламента комитета доакъашхо волаш, аграрни политике, Iалама гIулакх лорадара тIехьа дукха къахьегаш, республикерча юртбоахама хьал тоаде гIерташ болх беча Цхьорой Ахьмада. Юртбоахаме дикагIвола болхло ва, аьнна, белгалвир «Магас» оалача ГУПе къахьегаш вола тракторист Овшанаькъан Исроапил. Севастополе форда пехотан кулгал деча Велхенаькъан Абабукара Даьхен гIулакха латтарах йола орден елар.

МВД поликлинике лакхача боараме къахьегаш хиннача Галай Ахьмада йоагIа орден цун воIага ИбрахIимга дIаелар. Пандеми латтача хана, волонтер волаш унахой гIулакхага хьожаш чIоагIа къахьийгача ИбрахIима шийна а грамота елар. Дукхача вай мехкахоша хьинаре баь болх хьоахабир цу дийнахьа йоккхача кхетаче.

Дуккханешта доккха масал долаш, къахьега бахархой кIезига бац вай. Мехкадас белгалдир, Даьхен гIулакха латта эздий, яхь йола нах вай мел болча хана, республикан гIулакх хIара денна тоалуш хургхилар.