Наькъа кхерамзлен Iалашо яра беш болча балхах дийцар ГIалгIайчен Кулгалхочун дагавалархочо Антонов Игора. Цо белгалдир, 2023 шера хьалхарча кхаь бетта наькъа-транспортни хьовзам хинна, водителаш а чубаьгIа нах а байна моттиг хилар.

«Цун керттера бахьан да, водителаша наькъа бокъонаш лораеш цахилар, машен сиха лоаллаш хилар, духьала тIайоагIача машена юстара ца боалаш лелар, наькъаш дIа-хьа къастача кхаьчача, хьалха дIаваха везаш вола водитель дIацавахийтар», — аьлар Антоновс.

Цунна а ший бахьанаш да, уж дукха да. Водителаш, машен лоаллаш болча хана, бехктокхам кхетабеш бац, таханарча дено дIадеххача беса дикал йола наькъаш дац.

ГIалгIай Республикан кулгалхочун гIончас машений наькъашка зуламаш кIезигагIа хургдола оагIув а хьоахайир.

Келаматанаькъан Махьмуд-Iаьлас, шоаш из дош дувцача хана белгалдаьккхар, новкъа хьовзамаш нийслуш хилара бехкебараш шоаш даьча зуламах жоп дала оттабе беза, аьнна.

«Вай массане а кхетаде деза, хIара таьрахь — из сага бала а гIайгIа долга, цудухьа, массавар а оарцагIваьнна, наькъаш кхерамзленна Iалашо йолаш де деза вай», — аьлар ГIалгIай Республикан кулгалхочо.

Мехкадас яхачох, дукхагIа кхувш йоагIа тIехье дIакхетае еза, хоамашца, дешарца новкъа лелача хана, керттердар малагIа да царна ховргдолаш, тIахьожам лоаттабе беза водителаш кийчбеча балха даькъ тIа.

Карарча хана республике беш ба цу тайпара болх, тайп-тайпара ха яьннача наха юкъе новкъа лелара бокъонаш йоаржаеш, уж ца ховчунна хьалхайоахаш. Цо таро хулийтаргья аьнна хет, наьха бовр а царна човнаш хилар а мо дола зулам юхатоха.