«Хьожача юкъа, «Единая Россия» фракце доакъашхоша Хамхой Батыра, Кузнецов Александра, парте РИК кулгалхочо Кхоартой ИбрахIима, парте Илдарха-ГIалан отделене секретара Боканаькъан Яхььяс техкар, керда хьалъеш латтача ишкола хьал. Из лаьрхIа я 720 берá, муниципальни даькъ тIарча кердача микрорайоне хьалъеш латт из», — йоах хоамо.

Цу гIишлон доккхача кхаь даькъ тIа дешара а берашта кхетам балара а эшаш дола хьалаш хургда: ноанала цIа, тIера барзкъа хьалъолла моттиг, дешара кабинеташ, лоборатори, спортивни зал, хIама дуаш йола моттиг, кружок дIаяхьара лаьрхIа кабинет, секцеш, къахьегама урокаш ялара йола пхьоалле. Иштта цига я лифт.

Бераша шоайла дIахьоргья яхьаш, ловзарашта хьалъяьй майда, волейболах, баскетболах ловза моттигаш, истола тIара теннис, удаш бола никъ, кхыдола хьалаш да укхаза.

Карарча хана ишкола чура керда гIирс Iооттабеш латт. Дувцачох, гIишло кийча я ший болх дIаболабе, 98 процентага кхоачаш.