Кхоачашде дезача дешашта юкъе да, ахчанца, техникаца, из болх вIашагIболларца дувзаденнараш, аьлар «Сердало» газетага мехка кулгалхочун зарбан болх лелабераша.

«Республике йистедаьннад инвентаризаце, технически хин боахама хьалаш тахкара дола гIулакх. Вайна ма харра, «ИнгушрегионВодоканал» ГУПа, иштта доал деча даькъ тIарча администрацей балансе латташ я хин боахама комплекс«,- аьлар республикан ЖКХ, энергетика министра Лоалахой Ахьмада, ГIалгIай Республикан кулгалхочо Келаматанаькъан Махьмуд-Iаьлас кулгал деш, дIахьош хиннача совещане.

ХIанз укх сахьате, мехкаа хин боахама комплексашка болх дIахьош ба цахаддаш, дикал йола хий хилийта дагахьа, хин боахам экономически дегIабоалабара программа чIоагIъяьй.

Из декхар кхоачашдара «ГIалгIай республикан цаI вола оператор» ва ГУПо хьакхелла, хин боахама даькъ тIа хий хилийтара из дIа-юха декъара лаьрхIа. Цунна чубоагIаш хургба, ГIалгIай Республикан цIена а бIеха а (канализация) хий дIа-юха дахийтара боахам.

Цул совгIа, республикан Iаьдало, цунна чубоагIача боахамо лаьрхIад, кастлуш 18 насос эца, йIайхача ахкан замах эшаш дола хий Iалашдара.

Из дош дувцаш, дукхагIча даькъе терко тIаяхийтар Пхьилекъонгий-Юртарча хицарча хьала.

Говзанчаша яхачох, царех цхьадола хаттараш кхоачашде таро хургья Буро кIала керда ишкола йолча даькъ тIа, зIамига гIув оттайича. Цу тайпара Пхьилекъонгий-Юртарча хий хьаIоадеш йолча моттиге дукхагIа хий хилийта таро хургья. Аьлтий-Юрт-Пхьилекъонгий-Юрт, иштта Магас-Пхьилекъонгий-Юрт яха турбаш 90 процентага кхоачаш тиша яле а, юххерча Пхьилекъонгий-Юрта кхоачаш хий хургда эшшача боараме.

Хоам бу, уж деррига декхараш кхоачашде эшача ахчанца Iалашо яра, материальни оагIув хилийтара цхьацца долча боахамий, службай болх вIашагIбелла хила безилгах. Из деррига а ший йоаггIача аргIагIа кхоачашдеш латт тахан.