ГIалгIай Республика кулгалхочо Келматанаькъан Махьмул-Iаьлас кулгалдеш Магасе дIайихьача кхетаче дийцар, лаьттах дола экономически лерхIаме хаттараш.

Республика муниципальни дегIайоалаяра, социальни инфраструктура йоаржаяра новкъарле еш дола хаттараш дар тохкаш хиннараш.

Керттера дош дар, хьалъе йолаяь, дIахо кхоачаш ца еш латтийса Iаьдала лаьттан тIара гIишлош, цар шоай, Iаьдала яла еза налог хьачулуш ца хиларах паччахьалкхен хулаш дола зе а.

Кулгалхочо яхачох, цу тайпара эттача хьало тIехьа тIайоагIача хана социальни лерхIаме йола объекташ, хьалъе таро хулийтаргьяц, цунца дувзаденна кхоачамбоацараш совдаргда.

Иштта, гIишлонцара хьал нийсдаларах, тахан социальни хьалаш дегIаахара лаьрхIа йола гIишлонаш юрта йистте хьалъе езаш хул.

ГIалгIай Республика Правительства, Магаса викалаша дакъалоацаш дIадихьача цхьанкхетаре тахкар Малха- шахьара хургдола гIишлонцара сурт а дIахо хила еза таронаш а.

Келматанаькъан Махьмуд-Iаьлас белгалдир, хьалъе йоалаяьчча бесса латтйисача гIишлоша, дIа-юха кхийса дадача гIишлон гIирсаша, шахьара куц-сибат телхаду, аьнна.

Цо декхар тIадиллар, ГIалгIайчен доалахьарчунна министерства, Iаьдала масса долча арендах леладеча лаьтташта, иштта хьалъянза латтийсача гIишлоний объекташта терко тIаяхийта, аьнна.

«Тау бетта, 15-ча денга кхачалехьа сога хоам бе, малагIа лаьтташ арендах леладу а, малагIаш коммерчески оагIорахьа е мах ийбеча тайпара леладеш да а, цунах бюджете хьачулаш дар фуд а», — аьлар Келматанаькъан Махьмуд-Iаьлас.

Хоам бу, «юхасоцаяь латтача» доалахьарча объекташта тIахьожам бергхиларах.

Мехдас тIадиллар уж маца дIайолалургъя а хайна, шийга цунах хоам бар.

Нагахьа санна, цу даькъа тIа болх дIахо хьоргболаш беце, бокъоно дIадехача бесса, цар доалахьара хьа а даьха, лаьтташ муниципалитета юха чудала деза, е дохка е дIадаха оттаде деза.

«Гонахьа карташ яь, дукха даьсса лаьтташ дада вай, лела ца деш», — аьнна белгалдир республика кулгалхочо.