«Болх лохаш йолча ярмарке дакъа лоацаргда вай республикерча 20 болх-моттиго. Тайп-тайпара балхаш хургда ярмарке. Цул совгIа, бахархошта новкъостал дергда, ца ховча хаттара жоп луш, балха отташ дезаш дола каьхаташ кийчдеш», — йоах тхога бенача хоамо.

«МоллагIча ханага кхаьча волча сага пайда эца йиш йолаш я из моттиг. Цхьа никъ хьалаьца, дIабаха ловш болча къонача говзанчашта, хIетта дийша баьннарашта дика моттиг я из. Кердача хьисапе вIашагIъеллача ярмарко наха болх-моттигаш лох, таханарча хано дIадеххача тайпара», — белгалдир министра. Шоай балха тIа кхы а лакхбала, кхетам дикагIа чIоагIбе аьттув лураш дувцаргда ярмарке. Цул совгIа, кхыча мехка баха, болх бе дIаболхаш хилча, паччахьалкхено малагIа гIо дергда а довза йиш я цига. «Тахан вайцига геттара чIоагIа даьржа, эггара хьалхарча юхьанца терко е езаш, латт бахархошта болх бе моттигаш Iалашъяра гIулакх.

Цу гIулакха дIакхухьаш йолча кхетаченаша цхьа кIеззига аттачахьа даккхар лов из хIама. Регионерча ерригача болх-моттигаша цига дакъа лаьца, шоашта керда говзанчаш лохаргба, аьнна хет. Вай кагирхой хьаькъал долаш, дукха хIама довзаш, кхетадеш ба. Цхьа никъ хьа а лаьца, цу наькъ тIа къахьегаш дIахо дIабаха цар аьттув хургбараш юкъекхувла деза вай тахан», — аьлар Мехкадас Келаматанаькъан Махьмуд-Iаьлас, из гIулакх дувцаш. Ерригача Россе болх-моттигаш Iалашъяра йолча ярмарка шоллагIбола оагIув ахкан хьалхарча бетта 23-ча дийнахьа дIахьоргба. «Россера болх» яхача портала оагIонга гIолла довза йиш я деррига. ДикагIйола моттигаш харжа кагирхошта, цар даьшта, ноаношта гIо дергдола, цу гIулакхах бола говзанчаш оттабаьб цига.

Ярмарка дIахьоргья, ийс сахьат даьлча дIайолаяь нийсса ши сахьат даллалца, укх адресах: Эккажкъонгий-Юрт, МутаIаланаькъан цIерах бола урам, 283.