«Сомаши, тайп-тайпара комараши чуэцарга диллача, из беркат кхедеча хьалхалаттача кхыдолча мехкашца цхьан мугIаре латт вай республика. Из толам вай хилар белгалдир Россе юртбоахама гIулакхех йолча министерствос», — йоах тхога бенача хоамо.

Далла хоастам бе безаш, доккха беркат да вайна Iажий бешах хьадоалар. Котало яьккха, ший болх лакхача боараме дIахьочарех я ала йиш я «Беш-Гигант» оалача тайп-тайпарча фух бола Iажаш кхебеча моттигах. Укх итт шера дика толамаш даьхад цу бешамашка къахьегаш боахкараша. Цигара Iажаш бовзаш ба дуккхача миIингашка.

Республика кулгалхоша къахьег, вай мехка тайп-тайпара сомий, комарий бешамаш дукхагIа хилийта гIерташ. Тайсса, доал доацаш, яьда бIарий бешамаш а, цу лаьтта къахьегаш, царех дикка беркат эца ловш болча бизнесмений доалахьа кхаьчай. Вай мехкара лаьтташ массе шерашка хьаьна, беркате хиннад, цудухьа йоархIех йиза уж моттигаш ядийтар геттара харцахьа да.