«Хашагульгов» яхача юртбоахаме коартал чуэца болабеннаб
Вай республикерча «Хашагульгов» яхача юртбоахаме коартал чуэца болабеннаб укх деношка. «100 гектар йолча доазон тӀа, ялх сортах йола коартол дӀайийра оаха бӀаьстан хьалхарча бетта.
Тахан из беркат чуэца арадаьннад тхо. ХӀара гектара тӀара 40 центнер коартол йоал. Денош сов дӀайха, Ӏимеца латташ хиларах, пхи сахьат Ӏуйран даьлча дӀадоладеле, 11 сахьат даллалца болх бу оаха. Коартол, Даьла къахетамца, дика хиннай укх шера. Вай мехка санна, кхыча моттигашка дӀакхухьаргья оаха йохка.
Селий мехка, Ставрополе тхоай къоастаяь моттигаш я тха из дӀачуэцаш», — дийцар тхога цу балха кулгал деча Хьоашаланаькъан Ӏамархана.
Эггара чӀоагӀагӀа гӀадвугаш хиннар дар, кхай тӀа болх беш баьхкачарна юкъе дукхагӀбараш кагирхой хилар. Ахкан салоӀаш йола ха шоашта, цӀенна пайда беш дӀахьу цар.
