Шолжа муниципальни района бюджета, 2021 шера баьча балхах дийцар, финансай урхален бюджетни отдела кулгалхочо, Чекиева Марета. Цо яхачох, шоашта хьалхашка лаьтта бюджетни декхараш дизза кхоачашдаьд цу урхалено.

Шолжерча районни совета балхах лаьца дийцар, халкъа депутаташта хьалхашка, кулгалхочо Йовлой Мухьмада. Ше къамаьлдеш, цо белгалдир дIадахача шера даьдаьннар а, иштта дIахо йодача хана де дезарех лоархIаш райсовето, карарча шера, хьалха оттадаь декхараш а.

«ДIадахача 2021 шера, баьча балхага хьажача, белгалде деза Совето дика болх баь хилар, хьалхашка латта декхараш тIехдика кхоачашдар, района кхоачашданза даргдоаца балха декхар даима теркал а деш, цIаккха лаьгI ца болийташ, цу хьакъехьа болх дIабихьа хилар. Бакъда, хIанзчул тIехьагIа де дезар кхы а дукхагIа да. 2022 шу, массехк, чIоагIагIа къахьега дезарех хургда, вайна ма харра, керда вахара хьалаш юкъедаьнна а, иштта берригача мехка гIолла хувцамаш хинна а, ха я вайна хIанз латташ яр, цудухьа къаьстта депутаташ бехктокхаме хила беза шоай балхаца, ма хулла, кастагIа шоашкара дича бакъахьдар юкъе а доаккхаш», — аьлар Йовлой Мухьмада.