Илдарха-ГӀалий тӀара Градусова урам тоабара болх чакхбаьннаб
Илдарха-ГӀалий тӀара Градусова оалаш бола, 4 км латта урам тоабеш къахьийгар мехка. Вахара оагӀонцара моттигаш меттайоалаяра тӀехьа вӀашагӀъеллача къаман проектага гӀолла чакхбаьккхар из болх, шин даькъа бийкъа.
Хьалхарча оагӀонцара болх 2022-ча шера Загородни оалача моттигера Промыслови урама ӀотӀаотталца дола 960 метр доазув меттадоаладеш бар. Цу шера кхы а дӀахо бихьар болх - урама 954 метрага кхоачаш йола моттиг тоайир. Иштта 810 метр гӀашлой никъ биллар, лампаш йогӀаш, гӀандаш, нувхашта лаьрхӀа яьшкаш оттаеш къахьийгар цига, 30 метрага кхоачаш йолча моттиге хий тоадир.
«Градусова оалаш бола урам лоархӀаме ба цу шахьаре. Цу моттиге я № 2 йола ишкол, керттера маьждиг, базар, Осканаькъан Сулумбика цӀерах йола парк», - белгалдир вай мехкадас Келаматанаькъан Махьмуд-Ӏаьлас. Белгалде деза, цу берригача балхо дӀалаьцар 14 млн сом рузкъа долга.
