Илдарха-Гӏалий тӏара наькъаш тоадеш ба болхлой
Илдарха-Гӏалий тӏарча наькъий хьал меттадоаладара тӏехьа, къахьегаш ба тахан мехка. Чапаева цӏерахча урам тӏа асфальта никъ ӏобилла болабеннаб. Вай мехкадас Келаматанаькъан Махьмуд-Ӏаьлас хьаллоацаш, йоаржаеш проект я из. Иштта «Газпром» яхача оагӏон кулгалхоша дикка гӏо ду цу балха тӏа.
«Шахьарера 40 урам тоабар чулоацача проектацара болх ба тахан Чапаева оалача моттига куц меттадоаладеш дӏахьор. Шахьара бахархой хьал аттачахьа даккхара тӏехьа, дӏахьош хувцамаш да уж. Къаьстта наькъаш меттадоаладара болх чӏоагӏа лоархӏаме ба тахан», - дийцар «Сердалога» Илдарха-Гӏалий тӏарча администраце.
Шахьарерча хьакимаша тӏахьожам беш, дӏахьош да деррига балхаш. Боаггӏача боараме, бехктокхаме, деррига кхоачашдар теркалдеш, хьожаш ба шахьаре. Болх беча моттиге хӏара денна болхаш, кхоачамбоацараш дий хьожаш, хул хьакимаш.
