Илдарха-Гӏалий тӏарча №7 йолча ишкола тӏабодаш гӏашлой никъ биллар
20.08.2026 13:21
Промыслови оалача Илдарха-Гӏалий тӏарча урам тӏа керда гӏашлой никъ биллар. Шахьара да волча Дидиганаькъан Ахьмада тӏадилла 200 метрага кхоачаш асфальт ӏобиллаб цига, иштта машинаш сов сиха хехкаргйоацаш сунт диллад.
«Сердалога» шахьара мэрера бенача хоамах, деррига балхаш муниципальни ахчах кхоачашдаьд.
Керда гӏашлой никъ Спокойни оала урам Мехкахбаьха 70 шу дизар яхача урамца хотташ ба. Цул совгӏа, № 7 йола ишкол нах бахача куранца хотт цо. Хӏанзолца, машинаш лелача наькъа оагӏонца гӏолла, дӏа-хьа аха безаш бар нах.
Бахархоша хьакимашка дехар дир; кхераме йола из моттиг тоаеш болх дӏахьо, аьнна. Тахан кхоачамбоацараш юстардаьхад. Къаьстта ишколе долхача берашта йоккха паргӏато еш хӏама да из.
