Наркотикаша хьаьрбаьха машин хехкаш лийннараш, дӀалийцар Илдарха-ГӀалий тӀарча Ӏаьдало
Укх бетта 11-ча дийнахьа Ӏуйран, Буро кӀалхарча Заьзганаькъан цӀерах болча урам тӀа, номераш йоацаш, лела «Лада Гранта» яха машин соцае айттар полице болхлой, бакъда машин лоаллаш вагӀар, юха ца соцаш, тӀехъ- ийккхар, наькъашкара бокъонаш лора ца еш. Из хоам «Сердалога» бир МВД.
«Илдарха-ГӀалий тӀа кхаччалца царна тӀехьа машин хехкаш, массехказа урагӀа герз тохаш, иштта цар машина чархашта герз детташ тӀехьабахаб полице болхлой, уж совцабе гӀерташ. Машин лоаллаш ваьгӀар а цу чу хинна ши саг а наркотикаша корта хьаьрбаьккха волга хоаделар Ӏаьдала болхлошта. Машин соцае, арабовла ца тугаш; духьалбаьнна хьайзаб зуламхой, хӀаьта лоаллаш ваьгӀар полице болхлочоа качваха гӀийртав»,- йоах тхога кхаьчача хоамо.
Машин лоаллаш вагӀар, каьхаташ доацаш хиннилга гучадаьлар. Массехк зуламах бехктокхаме озаргва из: наькъашкара бокъонаш цалархӀарах, наркотикаша вохаваь волаш машин лалла харах, полице болхлошта духьалваларах, иштта бехктокхаме озаргба вожаш а. Зуламхой полице Ӏочубигаб, машин гӀод тохача моттиге дӀаоттаяьй.
