Из хоам тха газетага бу Ӏалама гӀулакхах йолча министерствон болхлоша. Хьун хьал тоадара тӀехьа оарцагӀбаьнна, 5 гектар йолча Шолжа кхалерча хьун боахамашка 13 эзар совгӀа га дӀайогӀаш болх дӀабихьар дӀадахача шера. Цу моттигерча хьунашка, кхы а 68 эзар совгӀа га дӀайогӀаш, болх дӀабахьа лерхӀ укх шера.

«КӀеззига ха яьлча, керда гаьнаш ураотта йолаенна листта хьу хьахьургья цу доазонашка. Белгалде деза, «Лорае хьунаш» яхача федеральни, «Экологи» яхача къаман проекташка гӀолла из болх дӀахьош хилар. 2019-ча шера денз, вай мехка дӀахьош болх ба из. Керттера декхар - гаьнаш эшаеннача моттигашка 100 процентага кхоачаш хьу меттаоттаяр. Хьун хьал хила боаггӀача боараме меттаоттадара тӀехьа дӀабахьа эшаш боккха къахьегам ба из.