ГӀалгӀайчен Магасе Россе ФАДН болх бе Ӏомабарах йола кхетаче дӀайихьар
Магас-Шахьара администраце, Россе къамашта юкъерча гӀулакхех йолча Федеральни агентствос болх бе Ӏомавеш йола кхетаче дӀайихьар, яхаш, дийцар «Сердало» газетага моттигерча миннацо.
«Семинар лаьрхӀа яр паччахьалкхен мугӀаре а, доал деча даькъ тӀа а болх беча наха. Из, дукхагӀча даькъе, йоагӀаш яр республикан къамашта, конфессешта юкъе бувзам лелабара долча хаттарашта.
Цу лоархӀамеча кхетачене дакъа лоацаш вар министр Мизенаькъан Руслан, министра гӀонча Ӏалбаканаькъан Артур, ГӀалгӀай Республикан миннаца, къамашта, конфессешта юкъерча гӀулакхех йолча отдела кулгалхо Харсенаькъан Мухьмад», - йоах хоамо.
Из кхетаче дӀайихьар вар СКФО, Крым Республике, Севостополь-Шахьаре гӀолла йолча Россе ФАДН моттигашта юкъерча урхаллен кулгалхочун гӀонча Сергей Валерьевич Разживин, иштта цига дакъа лаьцар «Россе халкъий ЦӀа» ФГБУ кулгалхочун гӀончас, Россе ФАДН хьалий центра кулгалхочо Михаил Николаевич Мишина.
Цига иштта дийцар къамашта, конфессешта юкъерча гӀулакхех бола хоам дикагӀа дегӀабоалабара, из болх лерттӀа вӀашагӀбелла хилийтара дола наькъаш.
