Арбитражни суд хьайийллар Магасе
Магасе Арбитражни суда лаьрхӀа керда моттиг хьайийллар. Цу лоархӀамеча кхетаче дакъа лоацаш вар вай мехкада Келаматанаькъан Махьмуд-Ӏаьла.
Россе суда оагӀонцара гӀулакх доаржадарах йолча федеральни программага гӀолла чакхбаьккхар из болх. Из суд вай мехка чӀоагӀа эшаш я, цунга гӀолла къестадергда наха юкъера къовсамаш. Вай мехкара экономика, вахара оагӀонца дувзаденнараш тоадара тӀехьа лоархӀаме дакъа дӀалоац цу моттига. Мехкадаь, Паччахьалкхен зарбан болх лелабераша белгалдечох, суда балхо 4,5 млрд сомага кхоачаш бола эшам хилийтанзар вай мехка.
«Судахой боаггӀача боараме шоай болх дӀабахьа йиш хургйолаш, къахьег тахан паччахьалкхено. Теша лов, цу моттиге дӀахьош бола болх, боаггӀача боараме бокъонаш лораеш, нийсхо оттаеш хургхиларах», - белгалдир Мехкадас.
