Магасе, бокъонах доацаш, къайлагӀа ладувгӀаш хилар техкар
Магасе, тохкамхоша йистедаьккхар, бокъонах доагӀаш доаца къайлагӀа фу дувц хара ладувгӀаш йола аппарат оттаярца дувзаденна уголовни гӀулакх, яхаш, дийцар «Сердало» газетага республике гӀолла йолча Россе тохкама комитета урхаллене.
Тохкамхоша яхачох, 2023 шера аьтинга бетта 14-ча дийнахьа, бехке веш волча сага маьхах ехкай, бокъонах доагӀаш деце а, лаьрххӀа ладувгӀаш йола аппарат, цо таро лу къайлагӀа дувцачунга ладувгӀа а иштта видео гӀолла сурт хьагойта а. Из, йий ца ховш, къайлагӀа йоаллаш зӀамига камера я, WӀFӀ-канале гӀолла болх беш.
«Цу тайпара болх бе йиш йолаш бац сиха тохкам бу бокъонаш лораю болхлой мара», — йоах хоамо.
Тохкамхоша цу гӀулакха шоай бе беза болх дӀабихьаб, из гӀулакх иштта хилар а гучадаьккхад, уголовни гӀулакх дала дезача дӀачуденнад.
