«ЛоархIаме дола дешаш дашха дIайихьача кхетаче дакъа лоацаш хилар, шахьара да вола Орцханаькъан Зайт, юкъарлен совета доакъашхой, дийша нах, наркоманена дарба деча моттигера болхлой. Наркоманех дарба деш йолча моттигера цхьан болхлочо дийцар, саг йоалае эттача хIара сагага, цун ВИЧ яха инфекция яц, наркотикашца бувзам лелабеш вац, аьнна, тешал деш каьхат хила деза. Ишттача наькъаца, инфекци ца яржийта, наркомани соцае аьттув хургба вай, аьлар цо. Керда дезал кхолла лаьрхIа вола саг лорашка чакхваьккхача ховргда, цун дегIаца малагIа во да», — йоах тхогарча хоамо.

Шахьара дас, дийшача наха, геттара дика хеташ, хьаллаьцар из гIулакх. Керда дезал кхоллаш бола нах, унахцIена болаш, дегIаца цхьаккха во оамал йоацаш, хила беза. Иштта ца хилча, ираз долаш, беркате хилац цар вахар. Таханарча дийнахьа, соцам баь чIоагIдаьдац из гIулакх. Кхы а дукха тохкам, болх бе безаш дош да из.