Магасе баха хилар «Даим йоага цIи» яха сийленг долча
Магас-Шахьара Кхела депутаташ баха хилар «Даим йоага цIи» яха сийленг оттадеча моттиге, уж балхаш йистедаха лаьрхIа да маьтсела бутт дIаболалуш, яхаш, хоам бу «Сердало» газетага лаьрххIача хоамо.
Укх наькъа уж балхаш дIахьош да гIашлой новкъа Iойилла хинна плитка хувцаш, иштта гIашлой лелача даькъ тIа наькъа йистегIолла баьццара гаьнаш дIайогIаш.
«ЛоархIаме да Сийлахь-боккха Даьймехка тIем тIа Котало яккхара 80 шу дизара ди дездарга уж йистедахар. Цига ухаргба кортамукъале бахьан шоай са Iодиллача наьха сийдеш бола бахархой а хьаьший а. Цига зизаш дехкаргда, дагабохаргба денал дола бIухой», - аьлар Магас-Шахьара Кхела депутата Дарсиганаькъан Хаваж-Бахьаудина.
Цу проектах лаьрхIад, «Даим йоага цIи» парка центре хилийта, юхедиса доазув тоадергда. Балхаш дIахьош да оттаяьча ханашка хьежжа. Нагахьа санна ара хаоттам хуле, маьтсела бутт дIаболалуш, уж балхаш йистедаргда.
